Мазкур воқеа 14 июль куни тонг пайти соат 05:00 да содир бўлган. Бу ҳақда «Дарё» хабар бермоқда.
Хабарга кўра, 14 июль куни Қашқадарё вилоятининг Чироқчи туманида қайнатаси билан тортишиб қолган келин ўзи ва икки нафар фарзандини поезд тагига ташлаб, ҳалок бўлган.
Шунингдек, келиннинг турмуш ўртоғи Россияда ишлаши қайд этилган.
«Бу оила Чироқчи туманида яшайди. Марҳуманинг эри Россияда ишлайди. Келин қайнатаси билан жанжаллашиб қолиб, ўзи ва икки фарзандини поезд тагига ташлаган экан. Марҳуманинг эри 15 июль санасида уйига қайтаётган экан», — дейилади хабарда.
Таъкидланишича, Чироқчи туман ИИБ бошлиғи Актам Бешимқулов воқеани тасдиқлаган.
«Воқеа кеча эмас, беш-олти кун илгари содир бўлган. Ҳақиқатан ҳам аёл ўзи ва икки нафар фарзандини поезд тагига ташлаб вафот этган. Воқеага оилавий можаро сабаб бўлган. Воқеа сабаби ва тафсилотларини масъул ташкилотлар ўрганмоқда», — деди Актам Бешимқулов.
Аввалроқ, Сирдарёда юк поезди аёл кишини уриб юборган эди.