Европа Иттифоқи янги ҳарбий қуролни синовдан ўтказишни бошлади

Европа Иттифоқи киберҳужумлардан ҳимоя қилиш тизимини синовдан ўтказишни бошлагани маълум қилинди.

Маълум қилинишича, Иттифоқ киберҳужумларнинг олдини олиш бўйича машғулотлар ўтказишни бошлаган бўлиб, жараён Финляндиядаги мавжуд бўлмаган энергетика компаниясига амалга ошириладиган сохта ҳужумни ўз ичига олади.

Агентлик маълумотларига кўра, синов жараёнидан ўтаётган киберҳужумлардан ҳимоя қилиш тизими Европа Иттифоқининг қатор мамлакатларида кўплаб соҳаларда қўлланилади.

Таъкидланишича, киберҳужумлар Европа Иттифоқининг олти ҳафталик киберхавфсизлик бўйича кенг кўламли машғулотларининг бир қисми бўлиб, унда мамлакатлар турли тизимлар ва таъминот занжирларига бўладиган «ҳужумлар»га қарши туриш, шунингдек, жамоатчилик билан алоқаларни мувофиқлаштириш ҳамда дипломатик жавобларга тайёрланиш каби босқичлардан ўтади. Киберҳужум Европа Иттифоқининг ташқи таъсирларга дош бера олиш қобилиятини синаш ва аъзо давлатлар ўртасидаги алоқаларни мустаҳкамлаш учун мўлжалланган.

«Bloomberg»нинг ёзишича, ҳозирда ЕИда йирик инқирозга биргаликда жавоб беришни самарали мувофиқлаштирувчи ягона тузилма мавжуд эмас. Машқлар эса Россиянинг Украинага қарши ҳар қандай ҳаракатини Ғарбга қарши киберҳужумлар билан бирлаштириши мумкинлиги сабаб юзага келган хавотирлар фонида ўтказилмоқда.

Қайд этилишича, сўнгги пайтларда Ғарб мамлакатларида, шунингдек, Киевда Россиянинг Украинага бостириб кириши мумкинлиги ҳақида баёнотлар пайдо бўлган. Россия президентининг матбуот котиби Дмитрий Песков бундай маълумотни бўш ва асоссиз кескинликнинг кучайиши деб атаган. Унинг таъкидлашича, Россия ҳеч кимга таҳдид солмайди.