Ўзбекистонда пенсияни фуқароларнинг мурожаатисиз тайинлаш йўлга қўйилади
Яқин бир йил ичида ёшга доир пенсияни тайинлашни фуқароларнинг мурожаатисиз амалга ошириш режалаштирилмоқда.
«Ёшга доир пенсияни тайинлашда ҳам давлат ўзининг мажбуриятини тўғри ҳис қилиб, мурожаатсиз пенсия тайинлаш тизимини киритмоқчимиз. Чунки жуда кўп инсонлар ишлайди, давлат ва жамиятга қанча хизмат қилади, умрини охирги босқичлари келганида бюрократияда қийналиб, баҳслашиб юради. Пенсия низоларига доир ишлар жуда кўп. Аслида бундай бўлмаслиги керак. Пенсия бўйича ҳеч қандай низолар қолмаслиги керак, чунки шунча йил ишлаганидан кейин давлат тегишли имкониятларни яратиб бериши керак», — дейди адлия вазир.
Руслан Давлетовнинг сўзларига кўра, ҳар қандай ноаниқликлар пенсия олувчининг фойдасига талқин қилиниши керак. «Мана шу тизимга бир йилда ўтишга ҳаракат қиламиз. Молия вазирлиги бу ерда асосий ижрочи, жуда яхши жамоа шаклланган, биргаликда амалга оширамиз», — дейди у.
