«Менга ўзбек келинларининг оилада ўрни йўқлиги алам қилади». Эридан ажрашган аёл ҳаёти ҳақида гапириб берди
Ўзбекистонлик аёл 34 ёшида иккинчи хотин бўлиб турмушга чиққани ҳамда 1 ой ўтмасдан нима сабабдан ажрашгани ва ҳозирги ҳаёти ҳақида гапириб берди.
Aёлнинг сўзларига кўра, у болаликдан ўзига тўқ оилада катта бўлган, ота-онаси жуда меҳрибон бўлиб, яхши тарбия берган. Турмуш ўртоғи аввал уйланиб ажрашган бўлса ҳам, жуда ўқимишли, ақлли, яхши касб эгаси бўлгани ва кўплаб ваъдалар бергани сабабли унга турмушга чиққан.
Шундай қилиб, аёл ўша эркак билан оила қурган. Кейинчалик эри биринчи аёли билан атиги 1 ой яшаганини айтиб берган. Орадан вақт ўтиб, аёл эрининг ҳамма нарсада — сўзларда, ҳиссиётларда, мулойимликда, совғалар улашишда зиқна эканини била бошлаган.
«Тўйдан олдин у ақллилигим сабабли мен билан соатлаб гаплашишни хоҳлашини айтарди. Лекин тўйдан кейин фақат иш, телефон, телевизор… Менга эса вақт йўқ…
У аслида бериши керак бўлган ҳамма нарсани — яхши сўз, меҳр, сайр қилиш кабиларни кейинроқ менинг талабим сифатида қабул қилди», — дейди аёл.
Aёл 10 кун давомида бу муносабатлар ҳақида чуқур ўйлаган ва кетишга қарор қилган. Бир сафар жанжаллашиб қолганларида эрининг «ҳамма шундай яшайди», деган гапи жуда оғир ботган. Кейинчалик аёл доимо эридан яхши сўз эшитиш умидида яшаб келганини эслаб, ўшанда уйдан кетганига афсусланмаслигини таъкидлаган.
У ўзбек аёлларининг келин бўлиб тушган хонадонида ўрни йўқлиги; ваъдалар, нафақат унга, балки никоҳ вақтида Худо олдида берилган ваъдалар ҳам бажарилмаслигидан қаттиқ ҳафа эканини таъкидлаган:
«Менга ўзбек келини эрининг оиласида ҳеч нарсага арзимаслиги, ҳеч ким эмаслиги, берилган ваъдалар бажарилмаслиги алам қилади. Эркаклар биз учун Худо олдида жавобгар эканликларини унутишади. У нима деб ўйлаганини билмайман, балки мени кетолмайди, деб ўйлагандир. Худога шукур, ҳозир яхшиман, ҳаётим ҳам яхши. Мен ‘феминист’ ёки бирон-бир машхурликка интиладиган аёл эмасдим. Эҳтимол, бошқа турмуш қурмасман, чунки энди эркакларга ишона олмайман. Aммо барчаси яхшиликка эканлигига аминман».
