Дунёдаги энг йирик вакцина ишлаб чиқарувчи корхоналардан бири ёниб кетди — видео

Дунёдаги энг йирик вакцина ишлаб чиқарувчи корхоналардан бири бўлган Ҳиндистон зардоб институти ёниб кетди. Бу ҳақда «Hindustan Times» хабар берди.

Фото: Facebook

Маълум қилинишича, Ҳиндистон зардоб институтида юз берган кучли ёнғин оқибатида камида беш киши вафот этган. Ҳодиса Пуна шаҳрида содир бўлган. Корхона коронавирус инфекциясига қарши вакцина ишлаб чиқариш билан шуғулланган.

«Бинодан тўрт киши эвакуация қилинди, аммо вазият назоратга олинганда қутқарувчилар беш кишининг мурдасини топишди», — деди шаҳар ҳокими Мурлидхар Моҳол.

Дастлабки маълумотларга кўра, институтнинг янги объектини қураётган ишчилар ҳалок бўлган. Ёнғиннинг келиб чиқишига пайвандлаш ишлари сабаб бўлганлиги айтилмоқда. Институт ижрочи директори Aдар Пунавалланинг сўзларига кўра, бахтсиз ҳодиса ишлаб чиқариш қувватининг камайишига таъсир қилмайди. Чунки институтда бошқа ишлаб чиқариш линиялари мавжуд.

Муассаса ижрочи директори Суреш Ядавнинг айтишича, коронавирус инфекциясига қарши вакцина ишлаб чиқарилишига зарар етмаган, у ёнғин содир бўлган жойдан узоқроқда жойлашган.


Ёнғин хавфсизлиги хизмати вакили Прашант Ранпайснинг маълум қилишича, бинолардан бирининг учинчи қаватдан бешинчи қаватгача қисми ёниб кетган. Ёнғинни ўчиришда ўнта ёнғин бригадаси жалб қилинган. Зардоб институти дунёдаги энг йирик вакцина ишлаб чиқарувчилардан бири ҳисобланади. У бир миллиард доза «AstraZeneca» вакцинасини ишлаб чиқариш учун шартнома имзолаган.