Хоразмда алкоголь маҳсулотларини бир неча минг АҚШ долларига сотган шахс қўлга тушди
Хоразмда фуқаро истеъмол учун яроқсиз бўлган алкоголь маҳсулотларини сотаётгани аниқланди. Бу ҳақда Бош прокуратура маълум қилди.
Фото: Review.uz
Хабарга кўра, Қўшкўпир туманида яшовчи фуқаро 0,45 литр сиғимига эга бўлган 2 минг 400 та шиша идишдаги алкоголь маҳсулотларини хеч қандай ҳужжатларсиз Урганч шаҳрида яшовчи фуқарога 3 минг 300 АҚШ долларига сотаётганида қўлга олинган.
Таъкидланишича, қайд қилинган ушбу маҳсулотлар истеъмолга яроқсизлиги, давлат стандартига ҳамда инсон соғлиги талабларига жавоб бермаслиги аниқланган.
Ҳозирда ушбу фуқарога нисбатан ЖКнинг 182-моддаси билан жиноят иши қўзғатилиб, тергов ҳаракатлари олиб борилмоқда.
