Санкт-Петербургда ўзбекистонлик эркак ёнғинда қолган аёлларни қутқарди
Санкт-Петербургда 7 йилдан бери ишлаб келаётган ўзбекистонлик мигрант ёнғин пайти бир нечта аёлни қутқариб, қаҳрамонга айланди.
Қайд этилишича, 25 апрель тонгида Санкт-Петербургнинг Подольская кўчасидаги кўп қаватли тарихий уйда ёнғин чиққан. Ҳолатдан хабар топган Олим исмли ўзбекистонлик мигрант ҳодиса жойига биринчи бўлиб етиб борган.
Эрталаб ишга келганимда соат 06:00 эди. Қарасам, деразадан олов чиқяпти. Шу заҳоти ўт ўчирувчиларга қўнғироқ қилдим. Улар етиб келган вақтда олов кучайгани сабаб одамлар деразадан чиқа бошлади… Аёллар бақириб, сакрамоқчи бўлганини кўрдим. Уларга сакрамасликларини айтдим. Ўт ўчирувчилар нарвонини оча бошлади, — дейди Олим.
Қўрқувдан сакрашга шай одамларни қутқаришга ўзбекистонлик эркак ҳам бел боғлайди. У сув оқишига мўлжалланган труба орқали юқорига кўтарилиб, аёлларга ёрдам кўрсатган.
Россияликлар 48 ёшли Ўзбекистон фуқаросини “ҳақиқий қаҳрамон” деб атамоқда. Олимнинг ўзи Ўзбекистонда десант бўлинмаларида хизмат қилгани ва бокс билан шуғулланганини айтган.
