Фарғонада тақиқланган диний маърузаларни тарқатиб келган 18 ёшли йигит суд қилинди

Фарғона вилояти Бешариқ туманида яшовчи 18 ёшли йигит Telegram’да гуруҳ очиб, ақидапарастлик ғоялари акс этган материалларни тарқатгани учун суд қилинди. Бу ҳақда ЎзA хабар қилди.

Фото: «Tez News»/Иллюстратив

Хабарга кўра, A.С. дадасининг уяли телефонидан фойдаланган ҳолда Telegram’да алоҳида гуруҳ ташкил қилиб, ақидапарастлик ғоялари билан йўғрилган диний мазмундаги материалларни тарқатган.

Мутахассислар A.С. томонидан Telegram гуруҳга юборилган диний мазмундаги материаллар сақланган ва кейинчалик ўчириб юборилган 8 гигабайт хотирали микрочипни тиклаш ишларини олиб борган. Тиклаш ишлари давомида жами 21,9 гигабайтдан иборат файллар тикланган. Мазкур файлларни кўздан кечириш давомида асосан диний мазмундаги материаллар эканлиги маълум бўлган.

Тайинланган судга оид экспертизанинг хулосасида унга тегишли бўлган кичик хотира қурилмасидан тикланган диний мазмундаги материаллар ақидапарастлик ғоялари билан йўғрилганлиги, уларни Ўзбекистонга олиб кириш, тайёрлаш ва тарқатиш тақиқланганлиги кўрсатиб ўтилган.

Мазкур иш жиноят ишлари бўйича Бешариқ туман суди томонидан кўриб чиқилган. Суд A.С.нинг қилмишидан пушаймонлигини, ёш эканлигини ҳисобга олиб, озодликни чеклаш жазосини тайинлади. Унга нисбатан қўлланилган қамоққа олиш эҳтиёт чораси бекор қилиниб, суд залида озод қилинди. Шу билан бирга, интернетдан фойдаланмаслик каби бир қатор қўшимча чекловлар юклатилди.

Эслатиб ўтамиз, ДХХ Қашқадарёда «Жиҳодчилар» гуруҳи фаолиятига чек қўйгани, Aндижонда «Жиҳодчилар» гуруҳига қўшилиб қолган йигит ва Бойсунда «Жиҳодчилар» гуруҳининг аъзолари қўлга олингани ҳақида хабар берилганди.