Тошкентда сочини ўстирган ўқувчининг ота-онаси 1,5 млн сўм жаримага тортилди
Тошкент шаҳрида қарорда белгилангандан узунроқ соч қўйган ўқувчининг ота-онаси 1,5 миллион сўм жаримага тортилди.
Қайд этилишича, улар Вазирлар Маҳкамасининг «Давлат умумий ўрта таълим муассасалари ўқувчиларини замонавий ягона мактаб формаси билан таъминлаш чора-тадбирлари тўғрисида»ги 666-сонли қарорига мувофиқ жаримага тортилган.
Қарорда ўқувчиларнинг сочига қуйидагича талаб қўйилган:
- ўғил бола ўқувчиларнинг таълим муассасасига танасининг очиқ қисмига татуировка туширган ёки пирсинг қилган, соқол қўйган, сочи 2-3 сантиметрдан узун бўлган ва ёрқин рангларга бўяган ҳолда келишларига;
- қиз бола ўқувчиларнинг таълим муассасасига танасининг очиқ қисмига татуировка туширган ёки пирсинг қилган, сочини ёрқин рангларга бўяган, юзини кўзга ташланадиган даражада макияж қилган, қулоғига биттадан ортиқ сирға таққан, бармоқларига узук таққан, қўл тирноқларини бўяган ва узун қилиб ўстирган ҳолда келишларига йўл қўйилмайди.
Афтидан, фуқароларга нисбатан жарима Маъмурий жавобгарлик тўғрисидаги кодекснинг 47-моддасига (Болаларни тарбиялаш ва уларга таълим бериш борасидаги мажбуриятларни бажармаслик) мувофиқ белгиланган — БҲМнинг беш баравари.
