Наманганда тунги клубнинг беҳаё рекламаси акс этган видеога изоҳ берилди
Ижтимоий тармоқларда Наманган вилояти Давлатобод туманида тунги клубнинг беҳаё рекламаси акс этган видео юзасидан вилоят ИИБ изоҳ берди.
Фото: видео лавҳадан
Хабарга кўра, Давлатобод туманида жойлашган «Rome» тунги клубининг Facebook’даги саҳифасига 13 март куни клубда шоу бўлиб ўтиши ҳақида беҳаё реклама акс этган видеоролик жойланган. Ҳолат юзасидан вилоят Ички ишлар бош бошқармаси томонидан суриштирув ўтказилганида ушбу видеодан мақсад мижозларни ўзига жалб қилиш бўлгани аниқланган.
Маълум бўлишича, клубнинг иш юритувчиси 25 ёшли йигит ушбу ролик фақат реклама учун олингани ва махсус шоу ўтказиладиган санада бундай ҳолга йўл қўйилмаслиги ҳақида изоҳ берган.
«Видеочиларни чақирдим. Улар ғоялар беришди. Биз унчалик бўлишини айтмаган эдик. Тасвирчиларнинг хатолиги билан видео озгина хунук тарзда чиқибди. Бунчалик оммалашиб кетишини билмаган эдик. Пушаймонмиз қилган ишимиздан. Узр сўраймиз», — дейди йигит.
Қайд этилишича, ҳолат юзасидан суриштирув ишлари давом этмоқда.
