Зеленский Москвага нисбатан санкциялар ва босим кучайтирилиши кераклигини айтди

Украина президенти Володимир Зеленский 4 май куни Прагада берган баёнотида Россия билан ўт очишни тўхтатиш исталган вақтда амалга оширилиши мумкинлигини айтди. Бу ҳақда Reuters хабар берди.

Унга кўра, сулҳ ҳеч бўлмаганда 30 кун давом этиб, дипломатик музокараларга имконият яратиши лозим. Зеленский Москва сулҳга жиддий ёндашиши учун халқаро ҳамжамият, айниқса АҚШ ва Европа Иттифоқи давлатларини Россияга нисбатан санкцияларни кучайтиришга ва ҳарбий ёрдамни давом эттиришга чақирган.

Прагада Зеленский ва Чехия президенти Павел йирик калибрли ўқ-дорилар етказиб бериш дастурини ҳам муҳокама қилган.

Хабарга кўра, 2024 йил давомида Чехия 1,6 миллион дона ўқ-дори етказган, 2025 йилда эса бу кўрсаткич 1,8 миллионга етиши кутилмоқда.

Ундан ташқари, Зеленский, Европада мудофаа ҳамкорлигини кучайтириш, F-16 самолётлари ва учувчи тайёрлаш дастурларини кенгайтириш ниятида эканини билдирган.

У 26 апрель куни Ватиканда Рим Папасининг дафн маросими чоғида АҚШ президенти Доналд Трамп билан қисқа учрашувда ҳаво мудофаа тизимлари ва Россияга қарши санкциялар масаласини муҳокама қилганини ҳам айтиб ўтган.

Шунингдек, Трамп ва Зеленский 30 кунлик ўт очишни тўхтатиш урушни тугатиш йўлидаги тўғри биринчи қадам бўлишига ишонмоқда.