Марказий тергов бошқармасининг собиқ ходими WikiLeaks маълумотларини ошкор қилгани учун 40 йил қамоқ жазосига маҳкум қилинди

МТБ собиқ дастурчиси Жошуа Шультега нисбатан бир қатор ўта маҳфий материалларни ошкор қилиш иши бўйича 40 йил озодликдан маҳрум қилиш жазоси тайинланди. Бу ҳақда Нью-Йорк суди қарорига таяниб, ТАСС агентлиги хабар берди.

– «Биз етказилган зарарнинг кўлами қанчалик даражада эканлигини ҳеч қачон била олмасак керак, аммо ҳеч шубҳам йўқки, у ўта баҳайбат», – деди судья Жесси Ферман.

Прокурорлар Шультега абадий қамоқ жазоси беришни, оқловчилар эса уни тўққиз йил озодликдан маҳрум қилишни сўрашган.

Шультени «Vault 7» иши бўйича айбдор деб топишди. Бу МТБ томонидан фойдаланувчиларнинг компьютерларини масофадан туриб бошқариш ва улар ҳақидаги ахборотни кузатиш учун ишлаб чиқилган дастурлар бўйича барча маълумотларнинг ошкор бўлгани ҳақидаги кодли ном саналади. У МТБнинг Лэнглидаги штаб-квартирасида жойлашган кибертергов марказининг яширин ички тармоғида сақланадиган деярли 10 мингта ҳужжат ва файлни ўз ичига олади.  

WikiLeaks — аноним манбалардан олинган ёки ошкор бўлган маҳфий ахборотни нашр этувчи халқаро нотижорат ташкилот.