Ўзбекистонда ижтимоий ҳимоя тизими қандай ривожлантирилиши маълум бўлди

Куни-кеча (14-февраль) ижтимоий ҳимоя тизимини такомиллаштириш бўйича бир қатор таклифлар Ўзбекистон Республикаси Президенти Шавкат Мирзиёевга тақдим этилди, хабар бермоқда мамлакат раҳбари матбуот хизмати.

Ўтган йилнинг июнь ойида «Аҳолига сифатли ижтимоий хизмат ва ёрдам кўрсатиш ҳамда унинг самарали назорат тизимини йўлга қўйиш бўйича комплекс чора-тадбирлар тўғрисида»ги фармон қабул қилинди. Ҳужжатга мувофиқ, Ўзбекистон Республикаси Президенти ҳузурида Ижтимоий ҳимоя миллий агентлиги ташкил этилди.

«Ўтган даврда Агентлик томонидан ижтимоий ҳимоя тизимининг самарадорлиги ва манзиллилиги жойларга чиқиб ўрганилди. Бу жараёнда тизимни маҳалла даражасида адолатли ташкил этиш, тўғри молиялаштириш, оғир аҳволга тушиб қолган одамларнинг ижтимоийлашувига кўмаклашишда камчиликлар борлиги аён бўлди», – дейилмоқда хабарда.

Эндиликда маҳалладаги “еттилик” оилалардаги ижтимоий муаммоларнинг сабаби ва омилларини аниқлайди, мавжуд имкониятларни баҳолаб, уларни оғир вазиятдан олиб чиқиш учун ижтимоий хизматларни сафарбар қилади.

“Саховат ва кўмак” жамғармасидан оиланинг ижтимоий аҳволини индивидуал баҳолаш асосида ёрдам кўрсатиш йўлга қўйилади.

Давлат раҳбари ушбу таклифларни маъқуллаб, тегишли ҳужжатларни ишлаб чиқиш, уларни ҳаётга самарали татбиқ этиш бўйича кўрсатмалар берди.

Янгиликлар