Олмаотада зилзила оқибатида камида 40 киши жабрланди

23 январ куни соат 9:00 ҳолатига кўра, Олмаотадаги зилзила оқибатида 44 киши жабрланган, улар шаҳардаги шифохоналарга етказилган.

«Турли жароҳатлар билан улар шаҳар касалхоналарига етказилган, улардан 34 нафари ёши катталар, 3 киши касалхонага ётқизилган, 31 нафари амбулатор даволанишга юборилган», — дея аниқлик киритди соғлиқни сақлаш вазирлиги Қозоғистон ҳукумати йиғилишида.

Шунингдек, 10 нафар болага тиббий ёрдам кўрсатилди: улардан 5 нафари касалхонага ётқизилди, 5 нафари амбулатор даволанишга юборилди.

Кўпчилик енгил ва ўртача даражадаги жароҳатлар олган — қўл ва оёқлар шикастланиши, пай чўзилиши, оёқларнинг лат ейиши.

«Уч киши турар жой биносининг иккинчи ва учинчи қаватидан сакраши оқибатида жабрланган. Текширувдан сўнг икки жабрланувчи амбулатор даволанишга юборилди. Учинчи беморнинг аҳволи оғир деб баҳоланиб, касалхонага ётқизилди», — дейилади хабарда.

Беш киши уйдан қочиб чиқиб кетаётганда жароҳатланган. Барча зарур тиббий ёрдам кўрсатилгач, улар амбулатор даволанишга жўнатилди.

23 январга ўтар кечаси ва эрталабки соатларда Олмаотада зилзила билан бир қаторда бир неча афтершоклар ҳам қайд этилди. Кўпчилик ўз уйларидан эвакуация қилинган ва кўчада ёки машинада бўлган. Гувоҳларнинг хабарларига кўра, айрим ҳудудларда йўлларда тирбандликлар пайдо бўлган.

Шаҳар фавқулодда вазиятлар бошқармаси маълумотларига кўра, кучли зилзила сейсмик станциялар тармоғи томонидан 2024 йил 23 январ куни соат 00:09 да қайд этилган. «Зилзила эпицентри Олмаота шаҳридан 264 км жануби-шарқда, Қирғизистон ҳудудида, 65 км чуқурликда жойлашган. Энергия класси — 15.1. Магнитудаси – 6,7», — дейилади хабарда.

АҚШ Геология хизмати маълумотларига кўра, зилзила эпицентри Қирғизистон ва Хитой чегарасида, Шинжон вилоятининг Айкол шаҳридан 129 километр узоқликда жойлашган. Унинг магнитудаси етти баллга тенг бўлган.

Тунда содир бўлган зилзила Олмаота ва Чимкентдан ташқари Остона, Олмаота, Жетису, Шарқий Қозоғистон, Жамбил ва Қарағанда вилоятлари, шунингдек, Ўзбекистонда ҳам сезилган.

Янгиликлар