Вабо 15 та мамлакатда жадал тарқалиб бормоқда
Жаҳон соғлиқни сақлаш ташкилоти раҳбари Тедрос Аданом Гебрейесус вакциналар танқислиги туфайли вабо дунёнинг 15 та мамлакатида жадаллик билан тарқалиб бораётганини маълум қилди, хабар бермоқда ТАСС.
«Инсониятнинг вабо билан курашида бир неча йиллик тараққиётдан сўнг ушбу хавфли касаллик 30 та мамлакатга қайтиб келди, бунга халқаро зиддиятлар, иқлимий инқироз ва ижтимоий-иқтисодий тенгсизлик сабаб бўлди. Гаити, Замбия, Зимбабве, Судан ва Эфиопиядаги касаллик ўчоқлари ташкилотни айниқса ташвишлантирмоқда», – деди ЖССТ раҳбари.
Гебрейесус 2022-йилнинг октябрь ойида вакциналар танқислиги туфайли халқаро координацион гуруҳ стандарт 2 дозали вакцинация схемасини 1 дозага алмаштиришга тўғри келганини эслатиб ўтди.
«Ушбу сўнгги чорага қарамай, 2024-йил бошида захира бўшаб қолди. Вакцина 15 та давлат касаллик фаол тарқалгани ҳақида маълум қилганида тугаб қолган эди», – қўшиб ўтди у.
Ташкилот раҳбари вабо кўринишидаги тез ўсиб бораётган таҳдидни англаши лозимлигини таъкидлаб ўтди. Гебрейесус барчани тоза сув таъминотини тиклашга ва атроф-муҳитни ифлослантирмайдиган ҳожатхоналар қуришга чақирди. Унинг сўзларига кўра, вабо ўчоқларини тезда аниқлайдиган эпидемиологик назорат тизимини шакллантириш лозим.
Бунга қадар 2023-йилда 30 та мамлакатда 708,2 минг вабо ҳолати қайд этилгани, 4,3 мингдан ортиқ одам вафот этгани хабар берилганди.
