Икки вилоятда иш ва ўқишга киритиб қўйишни ваъда қилганлар ушланди

Қашқадарё ва Навоийда пул эвазига иш ва ўқишга жойлаштириб қўйишни таклиф қилган шахслар қўлга олинди.

Маълум қилинишича, департаментнинг Қарши шаҳар бўлими томонидан ИИБ ходимлари билан ҳамкорликда тезкор тадбир ўтказилган. Унда Д.Н. фуқаро А.Х.нинг ишончига кириб, уни юқори лавозимда ишловчи танишлари ёрдамида «Шўртангаз кимё мажмуаси» МЧЖнинг қурилиш ва таъмирлаш бошқармасига ишга киритиб қўйишни ваъда қилгани аниқланган. Ушбу шахс жами пуллардан бўнак сифатида 1 500 АҚШ долларини олган вақтида ашёвий далиллар билан ушланган.

Шу каби, департаментнинг Навоий шаҳар бўлими томонидан ИИБ ходимлари билан ҳамкорликда ўтказилган тезкор тадбирда «Ч.C.» МЧЖ раҳбари фуқаро Н.А.ни Қарши шаҳар Ахборот технологиялари ва менежмент университетига ўқишга киритиб қўйиши эвазига 12 млн сўмни олган вақтида ашёвий далиллар билан ушланган.

«Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда», дейилади департаментнинг хабарида.

Янгиликлар