«Зудлик билан таъмирланишга муҳтож»: Саида Мирзиёева Бухородаги ижтимоий объектлар ҳолатини ўрганди
Вилоятга ташриф давомида ҳолати шошилинч таъмирга муҳтож бўлган боғчалар ва поликлиникалар кўздан кечирилди.
Ўзбекистон Президенти Администрацияси раҳбари Саида Мирзиёева Бухоро вилоятидаги ижтимоий соҳа объектларини реконструкция қилиш режалари билан танишди.
Унинг сўзларига кўра, вилоятга ташриф давомида аҳволи тезкор таъмирга муҳтож бўлган боғча ва поликлиникалар кўздан кечирилди.
Ҳудудларга сафарларимиз – Президент топшириқлари ижросининг қатъий назорати ва жойлардаги ҳар бир муаммога қаратилган эътибордир. Биз Бухорода кўздан кечирган боғча ва поликлиникаларнинг аҳволи ниҳоятда ачинарли, уларни зудлик билан таъмирлаш талаб этилади. Бу болаларимизнинг келажаги учун зарур, — деб таъкидлади Саида Мирзиёева.
Қайд этилишича, 1977-йилда очилган 21-сонли болалар боғчаси қайтадан қурилади, 46 минг нафар одамга хизмат кўрсатадиган 9-сонли поликлиника учун эса янги бино барпо этилади.
Ҳозирда мазкур муассаса 1972-йилда қурилган, тиббий стандартларга жавоб бермайдиган бинода – кам таъминланган фуқаролар учун мўлжалланган ётоқхонада жойлашган.
Ушбу бино ҳам тўлиқ таъмирланиши ва у ерда яшовчиларнинг шароитлари яхшиланиши билдирилди. Бундан ташқари, икки йил ичида вилоятнинг чекка туманларида жойлашган яна 36 та поликлиникани реконструкция қилиш кўзда тутилган.
