Уч нафар италиялик ўзбекистонлик найзабоз қизни гуруҳ бўлиб зўрлаганликда гумон қилинмоқда
Италия юниорлар терма жамоасининг уч нафар спортчиси ўзбекистонлик 17 ёшли найзабоз қизни гуруҳ бўлиб зўрлаганликда гумон қилинмоқда, хабар берди Nemolchi.uz лойиҳаси.
Ҳодиса ўтган йилнинг 4 августдан 5 августга ўтар кечаси Италия найзабозлик федерацияси томонидан ташкиллаштирилган ёшлар ретрити вақтида содир бўлган.
Жабрланувчининг сўзларига кўра, ретритнинг барча иштирокчилари базмда дам олаётган эди.
«Қиз ичимлик ичган, кейин эса учта йигит билан бир хонада уйғонган. Бу ерга қандай тушиб қолганини тушунмасдан, қочиб кетишга уринган, аммо кучли оғриқ уни тўхтатиб қолган. Ахийри хонасига етиб келгач, кўзларида ёш билан жамоадош қизга содир бўлган ҳодисани сўзлаб берган. Қизнинг баданида катта кўкариш излари ва яралар бўлган. Жамоадош қиз жабрланувчининг онасига қўнғироқ қилиб, бўлган воқеани айтиб берган. Она етиб келиб, қизини тез тиббий ёрдам бўлимига олиб борган ва жинсий зўравонлик содир бўлгани ҳақида хабар берган», – дейилган лойиҳа матнида.
Икки нафар гумонланувчи тергов остида, учинчиси — вояга етмаганлар иши бўйича прокуратура назорати остида. Улар ўзлари томон йўналтирилган айбловларни инкор қилишмоқда.
Жабрланувчининг адвокати прокуратура ва Найзабозлик федерациясининг тергов остидаги ўсмирларга қарши чора қўриш ҳақидаги инерциясини қоралади.
Ҳодиса содир бўлган Кьянчано-Терме шаҳри мэри Андреа Маркетти айбланувчилар аниқланиши билан муниципалитет уларга қарши судга даъво аризаси киритишини маълум қилди.
