Германияда аэропортнинг ахлат қутисидан 330 минг долларлик расм топилди
Германиянинг Дюсселдорф шаҳридаги аэропортда полициячилар ахлат қутисидан қиймати 330 минг доллардан ортиқ бўлган расмни топди. Бу ҳақда 11 декабрь, жума куни бошқарма ходимлари Facebook’да маълум қилди.
Фото: Facebook/ Polizei NRW Düsseldorf
Маълум қилинишича, расмнинг қонуний эгаси уни Германиядан Исроилга парвоз пайтида тасодифан тушириб қўйган. Расм йўқолгани ҳақида эса 27 ноябрда тегишли идорага мурожаат қилган.
«Расм текис картон қутига қадоқланган, уни эгаси аэропортдаги рўйхатдан ўтиш жойида унутиб қўйган. У расмни йўқотиб қўйганини Тел-Авивга учиб кетаётганда билиб қолган», дейилади полиция баёнотида. Айтилишича, расм француз рассоми Иву Тангига (1900–1955) тегишли.
Ушбу ишни тергов қилишга масъул бўлган полиция комиссари аэропортни тозалаш билан шуғулланадиган компания билан боғланиб, қидирув ишларига қўшилган. Қайта ишланадиган қутиларни текшириш пайтида назоратчилар контейнерлардан бирининг пастки қисмида санъат асарини топган. Шундан сўнг полиция расмни қонуний эгасига қайтариб берди.
Аввалроқ Париж апелляция суди мамлакат Маданият вазирлигига Иккинчи жаҳон уруши пайтида нацистлар томонидан ўғирланган учта расмни яҳудий коллекционери Рене Гимпелнинг меросхўрларига қайтаришни буюрган эди.
