Buxoroda “SES” xodimi hamshirani kaltakladi. Hamshiraning homilasi tushgani aytilmoqda

Buxoro shahar Sanitariya va epidemiologiya osoyishtalik markazi xodimi poliklinika hamshirasiga qo‘l ko‘tardi. Bu haqda viloyat IIB axborot xizmati “TezNews”ga xabar berdi.

Ma’lum qilinishicha, Buxoro qishloq xo‘jaligi mahsulotlarini ulgurji sotish bozorining kirish joyida o‘rnatilgan dezinfeksiya tunneliga fuqarolarning tana haroratini o‘lchash uchun 21 yoshli hamshira xizmatga jalb qilingan. Buxoro shahridagi 11-sonli oilaviy poliklinika hamshirasi bo‘lgan N.P. 10-iyul kuni soat 12:30 da kun juda issiq bo‘lgani uchun o‘sha yerdagi qorovulxonada salqinlagan.

“Oradan to‘rt-besh daqiqa o‘tgach, yana o‘z joyiga qaytgan hamshiraga Buxoro shahar Sanitariya va epidemiologiya osoyishtalik markazi xodimi, 34 yoshli ayol M.A. tanbeh bergan. Ular o‘rtasida nizoli holat yuzaga kelgan. Bundan jahli chiqqan M.A. hamshiraning yuz qismiga qo‘li bilan bir necha marta urgan”, — deydi viloyat IIB axborot xizmati mas’uli.

Mazkur bozorda xizmat olib borayotgan IIB hamda Milliy gvardiya xodimlari nizoli vaziyatni bartaraf etish bo‘yicha tushuntirish berayotgan vaqtida hamshiraning sog‘lig‘i yomonlashgan va hushdan ketib, yiqilgan. Unga zudlik bilan birinchi tibbiy yordam ko‘rsatilgan.

“Poliklinikamizda ishlovchi hamshiraning onasi qizi homilador bo‘lganligini, kaltak yeb, hushidan ketgan qizining homilasi tushganligini aytmoqda. Ammo hamshiraning homiladorligi haqida bizda aniq ma’lumot yo‘q. Bu gapning qay darajada to‘g‘riligi ekspertiza xulosasidan so‘ng ma’lum bo‘ladi”, — dedi Buxoro shahar tibbiyot birlashmasi qoshidagi markaziy poliklinika mudiri Ixtiyor Jumaqulov.

Hamshira hushiga kelgach, ikki ayol ham surishtiruv ishlari olib borish uchun Buxoro shahar Ichki ishlar organlari faoliyatini muvofiqlashtirish boshqarmasi huzuridagi tergov bo‘limi 3-son IIBga olib borilgan. Ayni paytda sudga oid tibbiy ekspertiza tayinlangan, holat yuzasidan surishtiruv ishlari olib borilmoqda.

Avvalroq Namanganda shifokor kaltaklangani haqida xabar berilgan edi.