Расул Кушербаев: «‘UzAuto Motors’ иши юзасидан компаниянинг бирорта вакили ҳам қатнашмаётганлиги жуда ғалати»
Олий Мажлис Қонунчилик палатаси депутати Расул Кушербаев «UzAuto Motors» акциядорлик жамиятига нисбатан «Рақобат тўғрисида»ги қонун талаблари бузилиши бўйича қўзғатилган ишни кўриб чиқишда компания вакиллари қатнашмаганлиги ҳақида хабар берди.
Маълум қилинишича, монополияга қарши курашиш қўмитаси томонидан «UzAuto Motors»да «Рақобат тўғрисида»ги қонун талаблари бузилиши бўйича қўзғатилган ишнинг давоми 19 август, чоршанба куни кўриб чиқилиши керак эди.
Қайд этилишича, ўтган сафар «UzAuto Motors»нинг илтимосига кўра, ишни кўриб чиқишда танаффус эълон қилинганди. Бироқ номаълум сабабларга кўра, «UzAuto Motors» вакиллари 19 август кунги ишни кўришда қатнашолмаслиги маълум қилган.
Шунга қарамай Монополияга қарши курашиш қўмитаси комиссияси аъзолари танаффус давомида ҳам «UzAuto Motors» вакилларининг сабабларини эшитиб, ўрганиб чиқишганлигини инобатга олган ҳамда ишни уларнинг иштирокисиз ҳам кўриб чиқиш мумкин, деб ҳисоблаган. Ишни кўриб чиқиш давом эттирилмоқда.
«‘UzAuto Motors’нинг ўзи учун муҳим бўлган ишни кўриб чиқишда бирорта вакили ҳам қатнашмаётганлиги жуда ғалати», — деди депутат Расул Кушербаев.
Эслатиб ўтамиз, аввалроқ Монополияга қарши курашиш қўмитаси «UzAuto Motors»га нисбатан иш қўзғатгани ҳақида хабар берилган эди. Кейинчалик «UzAuto Motors»га нисбатан қўзғатилган иш видеоконференцалоқа тартибида кўриб чиқилди.
Сўнгра «UzAuto Motors»га нисбатан қўзғатилган иш давомида аниқланган дастлабки қонун бузилиш ҳолатлари қайд этилди. Шунингдек, «UzAuto Motors» депутат Расул Кушербаевнинг енгил автомобиллар нархларини ошириш бўйича айбловига муносабат билдирди.
