Бухорода 1 млрд сўмлик товарни Ўзбекистонга ноқонуний олиб кирмоқчи бўлган чет эл фуқаролари ушланди
Бухоро вилоятида «Олот» чегара божхона постига хорижий давлатдан 3 та юк автомашинасида умумий қиймати 1 миллиард 79 милиион сўмлик ноқонуний буюмлар ушлаб қолинди. Бу ҳақда вилоят божхона қўмитаси «Тez News»га хабар қилди.
Фото: Давлат божхона қўмитаси ахборот хизмати
Маълум қилинишича, кириб келган 3 нафар фуқаро Д.Я., Р.Н. ва Ш.Э.лар бошқарувидаги 3 та юк автомашиналари белгиланган тартибда божхона кўригидан ўтказилганда, ҳужжатларда кўрсатилмаган умумий қиймати 1 миллиард 79 милиион сўмлик оғирлиги 43 188 килограмга тенг бўлган «Гранулалардаги полиетилен» товарлари борлиги аниқланган.
Ҳозирда юқоридаги ҳолатлар юзасидан божхона органлари томонидан суриштирув ҳаракатлари олиб борилмоқда.
Аввалроқ Тошкентда 11 миллион сўмлик буюмларни Ўзбекистонга ноқонуний олиб кирмоқчи бўлган шахс ушлангани ва Бувайдада машинасида ҳеч қандай ҳужжати бўлмаган 20,2 млн сўмлик телевизорларни олиб кетаётган ҳайдовчи ушлангани ҳақида хабар қилинганди. Шунингдек, Наманган шаҳрида машина юкхонасида 900 дона кучли таъсир қилувчи дорини олиб кетаётган ҳайдовчи қўлга олингани ҳақида хабар берилганди.
