Фарғонада сўнгги 7 ойда содир этилган ўғирлик жиноятларининг 10 фоизи автомашиналар билан боғлиқлиги маълум қилинди
Фарғона вилоятида сўнгги 7 ойда содир этилган ўғирлик жиноятларининг 10 фоизи автомашиналар билан боғлиқ эканлиги маълум қилинди. Бу ҳақда вилоят Ички ишлар бошқармаси матбуот хизмати хабар берди.
Маълум қилинишича, вилоятда автомашина билан боғлиқ содир этилган ўғирлик жиноятларининг 50 фоизи автомобиль эгаларининг машинани очиқ ва қаровсиз қолдириши оқибатида содир бўлган. Қолган ҳолатлар эса ойна синдириш, калит танлаш, сих ёрдамида автомашина эшикларини очиш ҳамда эшик ойнасини қўл билан очиш ёрдамида содир этилган.
Шунингдек, бу каби ўғирлик жиноятларининг асосий қисми бозорлар, савдо мажмуалари ва кўп қаватли уйлар олдида содир этилган.
Маълумот ўрнида, бу каби жиноятни содир этган шахс Жиноят кодексининг 169-моддаси 1-қисмида 3 йилгача озодликдан маҳрум қилиш билан жазоланиши мумкинлиги кўрсатиб ўтилган.
Aввалроқ Марғилонда «Жигули»ни олиб қочиб, вояга етмаган фуқароларни уриб юборган шахс ушлангани, Қўқонда таксида талончилик содир этган йўловчи қўлга олингани, Фарғона шаҳрида «Tracker» автомашинасини олиб қочган шахс ўн йилгача озодликдан маҳрум қилиниши мумкинлиги ва Бешариқда «Lacetti»ни олиб қочган вояга етмаган шахсга жиноят иши қўзғатилгани ҳақида хабар берилган эди.
