«Мен уни ўлдираман! Кафанни тайёрланг»: Ситора Фармонова «мухлисининг» янги таҳдидларини кўрсатди
Эркак 15 суткага қамоқ жазосини олишга улгурганди.
Бир неча кун аввал ўзбек ижодкори Ситора Фармонова унинг эътиборини қозонмоқчи бўлган бир эркак анчадан буён қиз ва унинг қариндошларини таъқиб қилиб юрганини айтганди. Аввалига у қизга Instagram орқали оддий хабарлар ёзиб юрган, аммо қиз жавоб қайтармаган. Сўнгра «мухлис» таҳдидларга ўтиб, қизни ўлдиришини айтган.
Куни-кеча қиз ушбу ҳолат тўғрисида тўлиқроқ сўзлаб берди:
«Уни 15 суткага қамашди, аммо бу унинг хулқ-атворига ҳеч қандай таъсир қилмади. Қўйиб юборилганидан бир соат ўтиб, у яна менга ва оиламга таҳдид қила бошлади. У акамга телефон қилиб: “Агар синглингни менга бермасанг, мен уни ўлдириб, эшигингни тагига осиб кетаман. Унга кафан тайёрлашинг мумкин», — деган Ситора Фармонова.
Ситора Фармонованинг айтишича, у билан йигитнинг онаси боғланиб, ўғлининг режалари билан бўлишган:
«Ўғлим Тошкентда қандайдир одам билан дўстлашган, у ўғлимга пул топишнинг осон йўлини ўргатибди. Унга агар бой қизни топиб, уйланса, хотинининг пулларига эга бўлишини айтишган. Ўғлим ҳеч кимни ўлдирмоқчи эмас, унга шунчаки пул керак. У кўпинча ҳуши жойида бўлмайди, ичиб олганида, мени ҳам танимай, уради», – деган эркакнинг онаси.
