Қозоғистоннинг Ўзбекистондаги собиқ элчисига суд ҳукми ўқилди

Нур-Султон шаҳрида 21 cентябр, сешанба куни Қозоғистон Ташқи ишлар вазирлигининг собиқ масъул котиби Aнарбек Карашев ва мамлакатнинг Ўзбекистондаги собиқ элчиси Ерик Утембаевга суд ҳукми ўқилди. Бу ҳақда Нур-Султон шаҳар суди матбуот хизматига таяниб «Tengrinews» хабар берди.

Ерик Утембаев.
Фото: «nuz.uz»

Маълум қилинишича, Ташқи ишлар вазирлигининг собиқ масъул котиби Aнарбек Карашевнинг элчихона биносини қуриш учун ажратилган маблағларни ўзлаштиргани аниқланган. Бу ишга Қозоғистоннинг Ўзбекистондаги собиқ элчиси Ерик Утембаев шерик бўлган. Суд жараёнида эса улар ўз ваколатларини суиистеъмол қилганликда айбланган.

Шунингдек, суд мажлисида Ташқи ишлар вазирлиги иқтисодий департаментининг собиқ директори Сакенова, департаментнинг собиқ ходимлари Нурекенов, Жумасанова, «TOO» раҳбари Қутдусов ҳам айбланувчи сифатида иштирок этган. Суд якунида барча судланувчиларга якуний ҳукм ўқилган.

Унга кўра, суд Карашев, Утембаев ва Нурекеновнинг биринчи марта судланаётганлиги ва уларнинг вояга етмаган фарзандлари борлигини ҳисобга олган. Карашев ва Утембаевга икки йил эркинликни чеклаш жазоси, Сакенова, Жумасановага икки йил, Нурекеновга беш йил қамоқ жазоси белгиланган. Кутдусов эса жаримага тортилган.

Шаҳар прокурорининг берган маълумотларига кўра, Ерик Утембаев гаров эвазига озод қилинган. Aнарбек Карашевдан 1,5 миллион доллар мусодара қилинган. Бундан ташқари, барча судланувчилар умрбод давлат хизматида ишлаш ҳуқуқидан маҳрум этилган. Таъкидланишича, ҳукм ҳозирда қонуний кучга кирмаган.

Маълумот ўрнида, Aнарбек Карашевнинг ҳибсга олиниши 2018 йилда маълум бўлган. У катта миқдордаги пора олганликда гумон қилинган. Ўша пайтдаги ҳуқуқни муҳофаза қилиш идоралари ходимларининг айтишича, Карашев масъулиятли давлат лавозимини эгаллаб туриб, вазирликнинг бўйсунувчи ташкилотлари раҳбарлари — Сакенова, Нурекенов ва Жумасанованинг ноқонуний хатти-ҳаракатларини яширган. Бунинг учун улардан мунтазам равишда катта маблағ, яъни 10 миллион тенгедан ортиқ пора олган.

Аввалроқ «чинозлик Аҳмадбой»нинг ёрдамчиси 9 йилга қамалгани ҳақида хабар берилганди.