Жо Байден мамлакатга айрим тоифадаги чет элликларнинг киришини тақиқловчи фармонни бекор қилди
24 февраль куни АҚШ президенти Жо Байден аввалги давлат раҳбари Доналдь Трампнинг мамлакатга айрим тоифадаги чет элликларнинг киришини тақиқловчи фармонини бекор қилди. Бу ҳақда RBK’га таяниб, Daryo хабар қилди.
Фото: cleveland.com
Маълум бўлишича, 2020 йилнинг апрель ойида Доналд Трамп Covid-19 пандемияси даврида Америка меҳнат бозори учун хавф туғдирадиган чет элликларнинг АҚШга киришини тақиқловчи ҳужжатни имзолаган. Кейинчалик фармон муддатини икки маротаба узайтирган.
Таъкидланишича, Байден ҳужжат АҚШ манфаатларини ҳимоя қилмаслигини айтган ва амал қилишини тўхтатган.
«Бу АҚШга зарар етказади, шу жумладан, АҚШ фуқаролари ва қонуний резидентлари оила аъзоларининг ўз оилалари қайта бирлашишига халақит беради. Бу, шунингдек, АҚШ иқтисодиётининг турли мамлакатлардан келган мутахассислар ишлайдиган тармоқларига ҳам зарар етказади. Ва бу ҳар йилги лотерея доирасида иммиграцион визаларни қўлга киритган одамларга ҳам зарар келтиради», — дейди Жо Байден.
Қайд этилишича, Жо Байден президент бўлиб сайланганидан кейин собиқ президент Доналдь Трамп томонидан қабул қилинган бир нечта фармонларни бекор қилган.
