Қашқадарёда туман судяси пора билан ушланди
Қашқадарё вилоятининг Чироқчи тумани судясига жиноят иши очилди. Бу ҳақда Судялар олий кенгаши Матбуот хизмати хабар берди.
Қайд қилинишича, Судялар олий кенгаши йиғилишида Бош прокурорнинг фуқаролик ишлари бўйича Чироқчи туманлараро суди судяси А.Б 200 АҚШ долларини олаётган вақтда ушланган. Уни Жиноят кодексининг 210-моддаси (пора олиш) тегишли қисми билан жиноий жавобгарликка тортишга оид тақдимномаси муҳокама этилган. Якунда Кенгаш хулосаси билан А.Б.ни жиноий жавобгарликка тортишга розилик берилган ва унинг судялик ваколати тўхтатилган.
«Тергов сири ва айбсизлик презумпцияси талабларидан келиб чиқиб, бошқа тафсилотлар ошкор қилинмайди», — дейилади хабарда.
