Тошкент шаҳрида коронавирусга чалинган 55 ёшли эркак вафот этди
Тошкент шаҳрида коронавирусга чалинган эркак ўткир нафас ва юрак-қон томир етишмовчилиги ҳамда ўпка шишидан вафот этди, деб хабар берди Соғлиқни сақлаш вазирлиги.
Тошкент шаҳар Олмазор туманида яшаган 55 ёшли Б.Ш. исмли эркак 2020 йил 13 июль куни Вирусология илмий-текшириш институти клиникасига ётқизилган.
Кейинчалик аҳволи оғирлашганлиги сабабли реанимация бўлимига ўтказилган. Унга COVID-19 инфекциясининг ўта оғир кечиши, икки томонлама пневмония ташхиси қўйилган. Хасталик ўткир респиратор дистресс синдроми, ўткир нафас етишмовчилиги, сепсис, полиорган етишмовчилиги, ўпка шиши асоратлари билан кечган.
Шунингдек, қандли диабет, юрак ишемик касаллиги, стенокардия, гипертония, артериал гипертензия каби ҳамроҳ касалликлар билан ҳам оғриган. Шифохонада беморнинг даволаниши давомида шифокорлар томонидан консультация ва консилиумлар қилинган, даволаш жараёни мутахассислар тавсияси асосида олиб борилган.
Бироқ шифокорлар томонидан стандартлар асосида ўтказилган реанимацион муолажаларга қарамасдан беморнинг аҳволи кескин оғирлашиб, ўткир нафас ва юрак-қон томир етишмовчилиги, ўпка шишидан вафот этган.
Aввалроқ Сирдарё вилоятида хизмат сафарида бўлган тошкентлик бемор коронавирусдан вафот этгани ҳақида хабар берилганди.
Маълумот учун, 2020 йил 31 июль соат 10:00 ҳолатига кўра, Ўзбекистонда коронавирус инфекцияси қайд этилганлар сони 23 558 нафарни ташкил этган. Шундан 13 680 нафари соғайган бўлса, 9741 нафар беморга шифокорлар томонидан белгиланган стандартлар бўйича даво чоралари кўрилмоқда.
