Самарқандда фуқаро олтин жойлашган «махфий харитани» 25 минг долларга пуллашга уринди

Самарқандда фуқаро танишинин ишончига кириб, гоёки олтин маъданлари жойлашган махфий геологик харитага эга эканлигини айтиб, пул ишламоқчи бўлди.

Аниқланишича, геологик хизматлар кўрсатиш фаолияти билан шуғулланувчи хусусий корхона директори келгусида ноқонуний бойлик орттириш мақсадида маҳаллий фуқаронинг ишончига киради.

Фуқаро, муқаддам ўзининг Тоғ-кон саноати ва геология вазирлигида маъсул лавозимларда ишлаганлиги ҳамда ўзида Самарқанд ва Жиззах вилоятлари ҳудудларида амалга оширилган геологик-қидирув ишлари натижасида яратилган олтин маъданлари жойлашган махфий геологик харита ва фотосуратлар борлигини айтиб, уларни 25 минг АҚШ долларига сотишини айтади.

Натижада, ўтказилган тезкор тадбирда мазкур шахс келишилган пуллардан 10 000 АҚШ долларини олган вақтида ашёвий далиллар билан ушланди, — дейилади хабарда.

Аммо тегишли ташкилотлар берган хулосага кўра, ушбу шахс иддао қилаётган ҳеч бир маълумот махфий ҳисобланмайди.

Шунингдек, «Ўзтрансгаз» акциядорлик жамияти таркибидаги «Муборак магистрал газ қувурлари» бошқармаси газ тарқатиш станцияси бўлими оператори Қарши шаҳрида яшовчи фуқарони юқори лавозимдаги танишлари орқали ушбу тизимидаги ташкилотлардан бирига назоратчи лавозимига ишга олиниши учун 4 000 АҚШ доллари талаб қилади.

Ташкил этилган тезкор тадбирда оператор сўралган 4000 АҚШ долларини олган вақтида ушланган.