Тошкентда фуқароларни 6 000 АҚШ долларига ўқишга киритмоқчи бўлган ўқитувчи ушланди
Фуқароларни Чирчиқ давлат педагогика институти ёки Тошкент давлат педагогика университетига ўқишга киритиб қўйишни ваъда қилган ўқитувчи ушланди. Бу ҳақда Прокуратура департаменти маълум қилди.
Хабарга кўра, Чирчиқ давлат педагогика институти ўқитувчиси Ш.Э. фуқаро Б.Т. ва Э.Ж.ларни ушбу институт ёки Тошкент давлат педагогика университетига танишлари орқали ўқишга киритиб қўйиш эвазига 6 000 АҚШ долларини олган вақтида ашёвий далиллар билан Бош прокуратура ҳузуридаги Департамент ҳамда ДХХнинг Шайхонтоҳур туман бўлимлари томонидан ушланган.
Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
