Call of Duty ва Battlefield яратувчиси Винс Зампелла автоҳалокатда вафот этди
Видеоўйинлар ишлаб чиқарувчиси Винс Зампелла Калифорния штатининг (АҚШ) ҳудудида йўл-транспорт ҳодисаси оқибатида ҳалок бўлди, дея хабар бермоқда NBC Los Angeles.
Ҳалокат 21 декабрь куни Лос-Анжелес шаҳрининг шимолида, Сан-Габриэль тоғларида содир бўлган. Винс Зампелла бўлган Ferrari автомобили йўлдан чиқиб кетиб, бетон тўсиққа урилиб кетган.
Йўловчи автомобил салонидан ташқарига отилиб кетган, ҳайдовчи эса ёнғин чиққан машина ичида қисилиб қолган. Йўл-транспорт ҳодисаси оқибатида ҳар иккиси ҳам ҳалок бўлган.
Винс Зампелла 55 ёшда эди. У Call of Duty видеоўйинлар франшизасини яратган Infinity Ward студиясининг собиқ раҳбари ҳисобланади. Шунингдек, Зампелла Titanfall, Titanfall 2, Apex Legends ва STAR WARS Jedi: Fallen Order каби ўйинлари билан машҳур бўлган Respawn Entertainment компаниясини ташкил этишда иштирок этган.
Бундан ташқари, Винс Зампелла Battlefield видеоўйинлар франшизасини яратган Electronic Arts DICE студиясига ҳам раҳбарлик қилган. У Battlefield 6 ўйинини ишлаб чиқишда ҳам иштирок этган.
