Ўзбекистонда «Она Ер нидоси» номли ҳужжатли фильм тақдимоти бўлиб ўтди
Ўзбекистонда экологик муаммоларга бағишланган «Она Ер нидоси» номли ҳужжатли фильмининг тақдимоти бўлиб ўтди. Унда «Замин» фонди Васийлик кенгаши раиси Зироат Мирзиёева иштирок этди.
Мазкур фильм, Қишлоқ хўжалиги вазирлиги, ФАОнинг Ўзбекистондаги ваколатхонаси ва «Замин» фонди кўмагида суратга олинди.
Жорий йилнинг 4-декабрь куни илк бор ФАОнинг Италиядаги Бош қароргоҳида илк бор жамоатчиликка намойиш этилган фильмнинг тақдимоти Ўзбекистонда «Тошкент ирригация ва қишлоқ хўжалигини механизациялаш муҳандислари институти» Миллий тадқиқот университети ҳамда Давлат аграр университетида бўлиб ўтди.
«Замин» фонди Васийлик кенгаши раиси талабалар билан самимий суҳбатда тупроқ деградацияси муаммоларини муҳокама қилди, бўлажак мутахассисларнинг ғоя ва таклифларини диққат билан тинглаб, экологик жараёнлар минтақанинг озиқ-овқат хавфсизлиги учун қанчалик хавфли эканини таъкидлади.
Қайд этилишича, ерларнинг таназзулга учраши инсоният олдида турган энг жиддий экологик муаммолардан бири бўлиб, бугун дунё қуруқлик ҳудудларининг қарийб 40% ва 3,2 миллиард инсон ҳаётига таъсир кўрсатмоқда.
Марказий Осиёда ер майдонларининг тахминан 37 % деградацияга учраган. Ўзбекистонда эса бу кўрсаткич 26% ташкил этиб, тупроқнинг шўрланиши, гумус миқдорининг камайиши ва қишлоқ хўжалиги ҳосилдорлигининг пасайиши билан намоён бўлмоқда.
