Андижонда 10 га яқин кўп йиллик дарахт кесиб ташлангани бўйича иш судга оширилди

Андижон вилояти Асака туманида 10 га яқин кўп йиллик дарахт кесиб юборилгани бўйича ҳужжатлар судга юборилди.

Таъкидланишича, ҳолат юзасидан «Асака в.л.» хусусий корхона раҳбарига нисбатан Маъмурий жавобгарлик тўғрисидаги кодекснинг 79-моддаси (Дарахтларни, буталарни, бошқа ўсимликларни ва ниҳолларни қонунга хилоф равишда кесиш, кундаков қилиш, шикастлантириш, йўқ қилиш ёки бошқа жойга кўчириб ўтказиш) 1-қисми бўйича тўпланган маъмурий жавобгарликка оид иш ҳужжатлари 9 февраль куни судга юборилган.

Шунингдек, ушбу ҳолатда табиатга 18 миллион 360 минг сўм миқдорида зарар етказилгани аниқланган.

Маълумот учун, туманда жойлашган «Тўрахон ота» чойхонаси эгалари корхона фаолиятини хусусий шифохонага ўзгартириб, қурилиш ишларини олиб борган. Мазкур ҳудуддаги ўнга яқин дарахтлар кесилган. Дарахтлар орасида каштан, арча ва элдор қарағайлари ҳам бўлган.