Тошкентда террорчилик ташкилотининг 30 га яқин аъзоси қўлга олинди
Тошкент шаҳри ҳуқуқни муҳофаза қилувчи идоралар томонидан ҳамкорликда ўтказилган тезкор тадбирда «Тавҳид ва жиҳод катибати» террорчилик ташкилотининг бир гурух аъзолари ушланди.
Маълум қилинишича, улар Тошкент шаҳри ҳудудида жамоавий йиғинларни ўтказиб, келгусида Сурия ҳудудида фаолият юритаётган террорчилик ташкилотларининг сафига қўшилишни режалаштириб келган.
Келтирилишича, текширув давомида «Тавҳид ва жиҳод катибати» тарафдорларининг сони 30 нафарга яқин бўлиб, ёшлардан иборат экани, уларнинг айримлари Андижон, Сурхондарё ва Қашқадарё вилоятларидан Тошкент шаҳрига ишлаш мақсадида келгани аниқланган.
Ҳозирда мазкур ҳолат юзасидан Жиноят кодексининг тегишли моддалари билан жиноят иши қўзғатилиб, тергов ҳаракатлари давом эттирилмоқда.
Маълумот ўрнида, «Тавҳид ва жиҳод катибати» Ўзбекистон Олий судининг 2016 йил 26 сентябрдаги қарори билан террористик деб топилиб, мамлакат ҳудудида унинг фаолияти тақиқланган.
