Ўзбекистон ва Қирғиз Республикаси Ташқи ишлар вазири Хитойда учрашди
11 май куни Хитойнинг Циан шаҳрида Ўзбекистон Республикаси Ташқи ишлар вазири Абдулазиз Камилов Қирғиз Республикаси Ташқи ишлар вазири Руслан Казакбаев билан учрашди. Бу ҳақда Ташқи ишлар вазирлиги маълум қилди.
Фото: Ташқи ишлар вазирлиги
Хабарга кўра, вазирлар икки томонлама алоқалар ривожланиши билан боғлиқ долзарб масалалар ҳамда минтақавий ҳамкорлик истиқболлари юзасидан фикр алмашди.
Шунингдек, март ойида Тошкентда бўлиб ўтган олий даражадаги музокаралар якунида эришилган келишувларни амалга ошириш муҳимлиги қайд этилди.
Таъкидланишича, томонлар Саноат кооперацияси бўйича «Йўл харитаси»ни, мультимодал транспорт коридори ҳамда «Хитой – Қирғизистон – Ўзбекистон» темир йўли лойиҳасини имкон қадар тез муддатда амалга оширишнинг муҳимлигини қайд этилди.
Учрашувда икки томонлама муносабатларга доир бошқа масалалар ҳам муҳокама қилинди.
