Президент таълим муассасалари агентлигининг ҳудудий бўлимлари ташкил этилади
Ўзбекистонда Президент таълим муассасалари агентлигининг ҳудудий бўлимлари ташкил этилади.
Маълум қилинишича, таълим даражаси, аввало, ўқитувчининг билим ва малакасига боғлиқ бўлади. Шу боис ихтисослаштирилган мактабларга раҳбар ва педагоглар икки босқичли танлов асосида қабул қилинади.
«Президент таълим муассасалари агентлигига ушбу тизим асосида юқори малакали ўқитувчиларни жамлаб, қўшимча ўқитиш, миллий ва халқаро сертификатлар олишига кўмаклашиш топширилди», дейилади хабарда.
Қайд этилишича, агентликнинг Педагогик маҳорат ва халқаро баҳолаш маркази негизида илмий марказ ташкил этиш вазифаси қўйилган. Таъкидланишича, у ихтисослаштирилган мактабларнинг ҳар бир йўналиши бўйича халқаро методика асосида илғор таълим дастурлари ишлаб чиқиш билан шуғулланади.
Шунингдек, бу ишларни самарали ташкил этиш учун Қорақалпоғистон Республикаси ва ҳар бир вилоятда Президент таълим муассасалари агентлигининг ҳудудий бўлимлари ташкил этилиши белгиланган.
