Ўзбекистонда ҳайдовчиларга ҳуқуқбузарликлар учун белгиланган жарима миқдори камайтирилади
Олий Мажлис Сенатининг 19 ноябрь кунги йигирма биринчи ялпи мажлисида йўл ҳаракати соҳасидаги ҳуқуқбузарликлар учун белгиланган жарима миқдорини камайтириш кўриб чиқилди.
Маълум қилинишича, мажлисда «Транспорт ва молия соҳаларидаги айрим ҳуқуқбузарликларни содир этганлик учун маъмурий жазо либераллаштирилиши муносабати билан Ўзбекистон Республикасининг Маъмурий жавобгарлик тўғрисидаги кодексига ўзгартиш ва қўшимчалар киритиш ҳақида»ги қонун кўриб чиқилган.
Таъкидланганишича, Маъмурий жавобгарлик тўғрисидаги кодексда назарда тутилган йўл ҳаракати соҳасидаги ҳуқуқбузарликлар учун белгиланган маъмурий жавобгарлик миқдори ҳозирги замон талаблари ва хавфлилик даражасига тўлиқ жавоб бермаётгани қайд этилган. Ушбу қонун билан маъмурий ҳуқуқбузарликларнинг хавфлилик даражасидан келиб чиқиб, мақбуллаштириш мақсадида 5 та модда санкцияси миқдори камайтирилиши белгиланган.
Хусусан, транспорт воситалари эгаси томонидан суғурта полисини олмаганлик ёки муддати ўтган суғурта полиси ёки суғурта полисида назарда тутилмаган шахс автотранспорт воситасини бошқаргани, йўловчиларни лицензиясиз ташиш билан шуғуллангани, паспорт тизими қоидаларини бузгани, фуқаролар томонидан валюта қийматликларини ноқонуний олиш ёки ўтказиш учун жарима миқдори камайтирилмоқда.
Шунингдек, сенаторлар томонидан транспорт воситасини бошқариш вақтида ҳайдовчиларга «bluetooth», қулоқчин ва бошқа қўлни банд қилмайдиган гарнитуралардан фойдаланишга рухсат берилиши масаласи муҳокама қилинган. Транспорт воситаси салонининг олд қисмига монитор (дисплей) ўрнатиш учун жавобгарлик бекор қилинмоқда, шунингдек, транспорт воситалари ҳайдовчиларининг белгиланган ҳаракат тезлигини ошириб юборганда тезликни ўлчайдиган махсус ускуналар қайд этган тезликдан соатига 5 километр айириб ташлаб ҳисоблаш жорий этилмоқда.
Бундан ташқари, ички ишлар органлари ёки консуллик муассасаси томонидан берилган биометрик паспорт (ID-картаси) мавжуд бўлган тақдирда ҳайдовчидан транспорт воситасини бошқариш ҳуқуқини берувчи ҳужжат, транспорт воситасини рўйхатдан ўтказганлик тўғрисидаги, шунингдек, транспорт воситасига эгалик қилиш, эгаси йўқлигида ундан фойдаланиш ёки уни тасарруф этиш ҳуқуқини тасдиқловчи ҳужжатлари, транспорт воситалари эгаларининг фуқаролик жавобгарлигини мажбурий суғурта қилиш бўйича суғурта полиси талаб этилмаслиги айтилган. Мазкур қонун сенаторлар томонидан маъқулланган.
