Ўзбекистонда илк бор ўта оғир аҳволдаги беморда мураккаб юрак операцияси муваффақиятли ўтказилди
Ўзбекистонда илк бор ҳам коронавирус оқибатида ўпкаси 65 фоиз зарарланган, ҳам инфаркт, ҳам инсультга чалинган ўта оғир аҳволдаги 60 ёшли беморда мураккаб юрак операцияси ўтказилди.
Маълум бўлишича, беморни тез тиббий ёрдам ходимлари шошилинч равишда Тошкентдаги клиникалардан бирига олиб келган. Қайд этилишича, сопороз ҳолатида бўлган, оёқлари шишиб кетган ва ётолмайдиган аҳволдаги 60 ёшли аёлни тиббиёт ходимлари зудлик билан жонлантириш бўлимига олган. Тезкор текширувлардан сўнг вазият ўта жиддий экани маълум бўлган.
Коронавирусга чалиниб, ўпкаси пневмониядан 65 фоиз зарарланган, ўпка плевра бўшлиқларида сув йиғилган беморга юрак инфаркти ташхиси қўйилган. Бундан ташқари, аёл бир пайтнинг ўзида инсультни бошдан ўтказаётгани аниқланган. Шунингдек, унга инфаркт асоратида юрак деворлари ёрилиши диагнози қўйилган.
«Бемор коронавирусдан азият чекаётган, ўпкаси жиддий зарарланган ҳолатда сунъий нафас олиш аппаратидан чиқа олармикан, деган жиддий хавотиримиз бор эди. Аммо онахонни зудлик билан жарроҳлик столига ётқизмасак, ҳаётини сақлаб қола олмасдик. Шу боис оила аъзолари ва яқинлари розилиги билан дастлаб унда коронарография амалиётини ўтказдик. Учта томирида шикастланиш, торайиш ва ёпилиш аниқланиб, аорта-коронар шунтлаш ва юрак ёрилган деворини пластика қилиш операцияси бажарилди», — деган кардиожарроҳ Рустам Ёрбеков.
Қайд этилишича, жараён беш соатдан ортиқ вақт давом этган ва мураккаб операция муваффақиятли якунланган. Операциядан кейин беморнинг аҳволи яхши экани, кислород ускунасисиз бемалол нафас олаётгани ва оёқларидаги шишлар қайтгани айтилган.
