Намангандаги каналдан жасади топилган қизчанинг ўлими сабаби аниқланди

Аввалроқ,  Наманганда катта Наманган канали устидан ўтган кўприк остининг сув оқими паст бўлган қисмидан ташқи тан жароҳатларсиз топилган қизалоқ ҳақида хабар берган эдик.

Фото: 4esnok.by

Маълум бўлишича, тергов-суриштирув ишлари давомида қизалоқни амакисининг хотини нима мақсадда итариб юборгани аниқланган. «Замон» информацион кўрсатувида ўқувчи қизнинг нега итариб юборилганига ойдинлик киритилди.

Таъкидланишича, 5 апрель куни Чортоқ туманидаги 47-мактабнинг 5-синфида ўқийдиган М.А.ни амакисининг хотини дарси тугамасданоқ олиб кетган. У қизалоқни Чортоқ туманидан оқиб ўтувчи катта Наманган каналига олиб бориб, итариб юборган.

22 ёшли келин аввалроқ оилада ўғрилик қилган ва шу сабабли оилавий келишмовчилик келиб чиққан. Бу ҳақида унинг қайнонаси гапириб берган:

«Келинларим ўртасида гап-сўз, жанжал бўлмаган. У келинимни ўғлим билан алоҳида чиқарган эдик. Аввалроқ ўша келиним ўғрилик қилиб қўлга тушди, шундан кейин ўғлим «мен ўғри аёл билан яшамайман», деб ажрашмоқчи бўлди. Биз кечир уни бир сафар десак ҳам, у билан ортиқ яшашни хоҳламади. Натижада шундан ғазабланган келин неварамни чўктириб, аламини олган»- дейилади хабарда.

Ҳолат юзасидан Жиноят кодексининг 97-моддаси 2-қисми «в» банди билан жиноят иши қўзғатилган.