«Ўзбек тилининг изоҳли луғати» илк марта лотин алифбосида нашр этилади

АОКАда 5 ноябрь куни бўлиб ўтган брифингда Фанлар академияси президенти маслаҳатчиси Омина Азизова илк марта «Ўзбек тилининг изоҳли луғати»ни лотин алифбосида чоп этишга тайёргарлик кўрилаётганини маълум қилди.

Қайд этилишича, «Ўзбек тилининг изоҳли луғати» лотин ёзувига асосланган ўзбек алифбосидаги тўлдирилган янги нашри мазкур луғатнинг лотин ёзувига асосланган ўзбек алифбосидаги дастлабкиси ҳисобланади.

Ҳозирги кунга қадар луғатни тайёрлаш юзасидан қуйидаги ишлар амалга оширилган:
1. Луғат янги имло қоидаларига мувофиқлаштирилди.
2. Луғат учун янги лисоний материаллар захираси яратилди ва у филология фанлари доктори, профессор Н.Маҳмудов раҳбарлигидаги таҳрир ҳайъати аъзолари томонидан сараланди.
3. Тавсия қилинган беш мингдан ортиқ луғавий бирлик изоҳланиб, луғат таркибига киритилди, шунингдек, луғат замонавий нашрлардан олинган кўплаб иллюстратив мисоллар билан ҳам бойитилди.
4. Луғатнинг 1670 бетдан иборат 1-жилди нашрга тайёрланди.

Ҳозирги вақтда луғатнинг 2-жилди таҳрир қилиниб, нашрга тайёрланмоқда. Луғат тузувчилар томонидан 3–5-жилдларга киритилган янги луғавий бирликларни изоҳлаш ишлари давом эттирилаётгани айтилди.

Шунингдек, ҳозирги кунда «Ўзбек тили синонимлари луғати», «Ахборот технологиялари атамаларининг изоҳли луғати» нашр этилиши назарда тутилгани, «Тарих атамаларининг изоҳли луғати»ни чоп этиш иши Тарих институти билан ҳамкорликда, «Юридик атамаларнинг изоҳли луғати» эса Давлат ва ҳуқуқ институти билан ҳамкорликда амалга оширилиши таъкидланди.