Ўзбекистон иқтисодиёти асосан эркин бўлмаган мамлакатлар гуруҳида қолди

Ўзбекистон «Heritage Foundation»нинг навбатдаги «Иқтисодий эркинлик индекси» бўйича ҳисоботида ҳам иқтисодиёти асосан эркин бўлмаган мамлакатлар гуруҳида қолди.

Ўзбекистон мазкур индексда 55,7 балл (олдинги ҳисоботдагидан 2,6 баллга пасайган) билан 117-ўринни эгаллаган. Рейтингга жами 177 та мамлакат бўйича маълумотлар киритилган. Ўзбекистон индексга кўра иқтисодиёти асосан эркин бўлмаган мамлакатлар гуруҳида қолган.

Иқтисодий тараққиёт ва камбағалликни қисқартириш вазирлигининг қайд этишича, сўнгги беш йилда Ўзбекистон мазкур рейтингда умумий жиҳатдан қараганда 35 та ўринга юқорилаган. Лекин 2022 йил ҳисоботига кўра, мамлакат 9 та поғонага пастлаган.

Рейтингда дунё бўйича иқтисодиёти энг эркин мамлакат деб Сингапур (84,4 балл), Швейцария (84,2 балл) ва Ирландия (82,0 балл) топилган. Энг қуйи ўринларни эса Куба (29,5 балл), Венесуэла (24,8 балл) ва Шимолий Корея (3,0 балл) эгаллаган.

Маълумот учун, иқтисодий эркинлик индекси мамлакатлардаги иқтисодий эркинликни баҳолайди. Мазкур рейтинг «Мерос фонди» (The Heritage foundation) АҚШ тадқиқотлар маркази ва «The Wall Street journal» нашри билан ҳамкорликда чоп этилади. Рейтинг ҳукумат аралашувининг йўқлиги ёки ишлаб чиқаришга тўсқинлик қилиш, товар ва хизматларнинг тақсимланиши ҳамда истеъмоли, фуқароларнинг эркинлигини зарурий ҳимоя қилиш ва қўллаб-қувватлаш каби талаблар асосида шакллантирилади.