Банкирлар 119 нафар фуқаро номига расмийлаштирилган салкам 1 млрд сўмни ўзлаштирган
Қашқадарё вилоятининг Чироқчи туманида банк ходимлари 119 нафар фуқаро номига расмийлаштирилган салкам 1 миллиард сўмлик кредит маблағларини ўзлаштирган.
Фото: «Tez News»
Таъкидланишича, «Қишлоққурилишбанк»нинг Кўкдала филиали мансабдор шахслари Чироқчи туманининг Кўкдала қишлоғида яшовчи 119 нафар фуқаро номига расмийлаштирилган салкам 1 миллиард сўм кредит маблағини ўзлаштириб юборган.
Вилоят прокурорининг маълумот беришича, 2020-2021 йилларда вилоятда 49 нафар банк ходимига нисбатан 31 та жиноят иши қўзғатилган.
«Микрокредитбанк»нинг Чироқчи филиали собиқ бошқарувчиси Файзиев тадбиркорга ажратилган 786 миллион сўм кредит маблағи қайратилмаган бўлса-да, кредит таъминоти учун гаровга олинган кўчмас мулкни гаровдан чиқариб, кредитни ўзлаштирган», — дейди вилоят прокурори Эркабой Тожиев.
Эркабой Тожиевнинг қўшимча маълумот беришича, вилоятда соғлиқни сақлаш тизимида ҳам коррупция илдиз отган бўлиб, 2020-2021 йилларда 27 та жиноят иши бўйича 28 нафар соғлиқни сақлаш тизими мансабдори жавобгарликка тортилган.
