Наманганда «Damas» 71 ёшли пиёдани уриб юборди
Наманган вилояти Чуст туманида 25 октябрь куни «Damas» йўлни кесиб ўтаётган 71 ёшли пиёдани уриб юборди.
Маълум бўлишича, воқеа туманнинг Кўктош маҳалласида содир бўлган. Унда Чуст туманида яшовчи, 1991 йилда туғилган ҳайдовчи «Damas» русумли автомашинасини бошқариб бораётиб, йўлни кесиб ўтаётган 1950 йилда туғилган пиёдани уриб юборган.
Оқибатда пиёда чап қўл тирсак суягининг ёпиқ синиши, бош мия очиқ шикасти ташхиси билан шифохонага ётқизилган. Жабрланувчи кўрсатилган тиббий муолажаларга қарамай, 26 октябрь куни вафот этган. Қайд этилишича, ушбу ҳолат бўйича Чуст туман ИИБ ҳузуридаги тергов бўлими томонидан 2021 йил 27 октябрь куни Жиноят кодексининг 266-моддаси (Транспорт воситалари ҳаракати ёки улардан фойдаланиш хавфсизлиги қоидаларини бузиш) 2-қисми билан жиноят иши қўзғатилган.