Тошкентдаги ҳар бир маҳаллага ободонлаштириш учун маблағ ажратилади
Тошкентдаги ҳар бир маҳаллани ободонлаштириш учун 2 миллиард сўмдан маблағ ажратилади. Бу ҳақда президент матбуот котиби Шерзод Асадов брифингда маълум қилди.
Хабарга кўра, президент Шавкат Мирзиёев мутасаддиларга Парвоз маҳалласини намуна қилиб олиб, Тошкент шаҳридаги барча 524 та маҳаллани шундай обод қилиш бўйича топшириқ берган.
«Жума куни давлат раҳбари Яшнобод туманида аввал аҳволи оғир бўлган Парвоз маҳалласига ҳам борган эди. Бугун вазият бутунлай ўзгарган. «Обод маҳалла» сиёсатини амалга ошириш натижасида бу маҳалланинг қиёфаси тубдан ўзгариб, аҳолининг осуда яшаши ва дам олиши учун барча шароитлар яратилган. Ҳамма жой тоза, тартибли», — деди Шерзод Асадов.
Қайд этилишича, ҳар бир маҳаллага ҳозирги ҳолатидан келиб чиқиб, ўртача 2 миллиард сўмдан маблағ ажратиш буйича топширик берилган.
