Президент Ўзбекистон халқига Рамазон ҳайити табригини йўллади

Шавкат Мирзиёев узоқ-яқин мамлакатлар мусулмонларини ҳам самимий қутлаб, уларга тинчлик, бардавом тараққиёт ва фаровонлик тилади. Бу ҳақда Президент матбуот хизмати хабар қилди.

«Юртимиз мўмин-мусулмонлари ва бутун халқимизни ер юзидаги ислом уммати томонидан кенг нишонланаётган улуғ ва муборак айём – Рамазон ҳайити билан чин қалбимдан самимий табриклайман.

Эл-юртимиз учун инсонпарварлик, сабр-қаноат, хайру саховат ва шукроналик тимсоли бўлган ушбу қутлуғ байрам кунларида барчангизга ўзимнинг чуқур ҳурмат-эҳтиромим ва эзгу тилакларимни билдираман», — деди Шавкат Мирзиёев.

Шунингдек, Президент Шавкат Мирзиёев бутун дунё мамлакатлари ҳамда Ўзбекистонни пандемия билан боғлиқ мураккаб синовларни бошидан ўтказаётганини таъкидлаб ўтди.

«Қадрли юртдошлар!
Аллоҳ таолонинг марҳамати ёғиладиган ушбу барокатли ва нурафшон кунда сизларни яна бир бор азизу мукаррам Ийд ул-Фитр билан чин дилдан табриклайман.

Меҳнаткаш ва оқкўнгил халқимизнинг мўътабар моҳи Рамазонда қилган барча эзгу ният ва дуолари ижобат бўлсин!
Жонажон Ватанимизни, азиз халқимизни Яратганнинг Ўзи паноҳида асрасин!
Рамазон ҳайити барчамизга муборак бўлсин!», — Ўзбекистон Республикаси Президенти Шавкат Мирзиёев.