«Зузу ёввойи табиатга қўйиб юборишга тайёр эмас» — Тошкент ҳайвонот боғи

Тошкентда қафасга ташлаб юборилган қизга тегмаган айиқни очиқ табиатга қўйиб юбориш таклиф қилингани ҳақида хабар берилган эди. Тошкент ҳайвонот боғининг маълум қилишича, Зузу лақабли айиқ ёввойи табиатга қўйиб юборишга тайёр эмас.

Таъкидланишича, ёввойи ҳайвонларни тутқунликдан ёввойи табиат қўйнига қўйиб юбориш — жуда мураккаб ва масъулиятли вазифа. Ўзи учун ҳеч қачон озуқа топмаган ва ов қилишни билмайдиган, умр бўйи одамнинг қўлидан овқат еган ва ундан қўрқмайдиган айиқ оч қолганда дарров дуч келган аҳоли пунктига боради ва қўрқиб кетган одамлар томонидан ўлдирилади.

«Тутқунликда туғилиб ўсган ва ота-онаси тарбиясини олмаган жониворлар ўз қардошлари билан тил топиша олмайди, овқат топа олмайди, бошқа жониворлар билан рақобатлаша олмайди ва кучлироқ рақибдан ҳимоялана олмайди. Турли юқумли касалликлар ва жароҳат етиши эҳтимолини ҳам назардан қочирмаслик керак. Асосийси эса улар жонивор учун энг катта хавф туғдирадиган овчи, браконерларни фарқламайди ва улар билан учрашувдан қочиб қутулиб қола олмайдилар. Зузу ёввойи табиат қўйнига қўйиб юборишга тайёр эмас», — дейди ҳайвонот боғи илмий ходими Феруза Мирсолиҳова.

Унинг сўзларига кўра, Зузу Кавказ қўнғир айиқларининг кенжа тури бўлиб, тегишли равишда Кавказда яшайди — Ўзбекистон ҳудудида эса оқ панжали айиқ яшайди. Шунингдек, Зузу Боку ҳайвонот боғида келиб тушган, у ердан эса жуда кичиклигида Ўзбекистонга олиб келинган, одамлар томонидан боқиб, тарбияланган.

Менимча, киперларидан кўрган ғамхўрлик ва меҳр унга йиртқичларга хос фазилатларни намоён қилишга имкон бермади. У одамдан ёмонлик кўрмаган, шунинг учун бўлса керак, болага ёмонлик қилмаган. Худога шукурки, бу даҳшатли воқеа ибтидоси хайрли бўлди», — деган Боку ҳайвонот боғи директори Азер Ҳусейнов.