Иссиқхоналарга табиий газ етказиб беришга қисман чекловлар белгиланди
«Ҳудудгазтаъминот» иссиқхона хўжаликларига етказиб бериладиган табиий газга қисман чекловлар киритилаётганини маълум қилди.
12 декабрь куни ижтимоий тармоқларда Самарқанд вилоятидаги иссиқхонага табиий газ етказиб бериш 50 фоизга қисқаргани ҳақида огоҳлантириш хати тарқалганди. Тшкилот бунга жавобан ҳаво ҳароратининг кескин пасайиши натижасида истеъмолчиларнинг табиий газга бўлган талаби кескин ошиб, бунинг натижасида айрим ҳудудлардаги қувурларда газ босимининг пасайиши кузатилаётганини таъкидлаган.
Биринчи навбатда аҳоли хонадонлари ва ижтимоий соҳа объектларини табиий газ билан таъминлаш устувор вазифа эканлигини инобатга олган ҳолда айрим улгуржи истеъмолчиларга чекловлар киритилмоқда, дейилади хабарда.
Ўзбекистон Республикаси Президентининг 2024 йил 26 сентябрдаги ПҚ-339-сон қарорига мувофиқ босим тушиши ёки узилишлар бўйича иссиқхона хўжаликларини камида 24 соат олдин «Ҳудудгазтаъминот» АЖ томонидан мажбурий хабардор қилиш амалиёти жорий қилиниши белгиланган. Газ таъминоти корхоналари томонидан доим мазкур амалиёт бўйича иш юритилиб, чеклов киритилишидан камида 24 соат аввал иссиқхона хўжаликларига огоҳлантириш юборилади.
Вазирлар Маҳкамасининг 2023 йил 27-октабрдаги 567-сонли қарорига кўра, аҳолининг газ таъминоти тизимида фавқулодда ҳолатлар юзага келганда, иссиқхона хўжалигида етарли миқдорда муқобил ёқилғи захирасининг мавжуд бўлиши белгиланган.
«Ҳудудгазтаъминот» АЖ, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари ҳамда иссиқхона хўжаликлари ўртасида уч томонлама келишувда ҳам кўрсатиб ўтилган.
Шу муносабат билан уч томонлама шартнома шартларига мувофиқ иссиқхона хўжаликларига етказиб бериладиган табиий газга қисман чекловлар киритилган даврларда иссиқхона хўжаликлари захира ёқилғи турларидан фойдаланишга вақтинчалик ўтишлари лозим бўлади. Қайд қилинишича, мазкур чекловлар фақат ҳаво ҳарорати кескин пасайиб кетган вақтда қўлланилади. Қувурлардаги газ босимлари барқарорлашганда чекловлар бекор қилинишини маълум қилинди.
