Хоразмда укасининг ҳотинига жинсий алоқа қилишни таклиф қилган эркак 5 суткага қамалди

Хоразм вилояти Боғот туманида ўз келинига жинсий алоқа қилишни таклиф қилган эркакка нисбатан ҳукм оқилди. Бу ҳақда Олий суд порталида ҳабар қилинади.

Фото: «Tez News»

Воқеа 28 июль куни соат 23:00 атрофида Қорабоғ маҳалласида содир бўлган. Аниқлик киритилишича, 37 ёшли М. А. (эрининг акаси) С. А.га яқин муносабатларга киришиш эвазига 100 минг сўм таклиф қилган. Келин бу таклифни рад этган ва қайнонасининг хонасига югуриб кетган. Аммо фуқаро унинг орқасидан эргашиб, номақбул таклифлар беришда давом этган.

Суд мажлисида М.А. воқеа содир бўлган куни келини билан спиртли ичимлик истеъмол қилганини маълум қилган. Фуқаро уни бошқа эркаклар билан муносабатда бўлган деб ўйлаб, у билан шу масалада гаплаишга уринганини айтган. Унинг сўзларига кўра, у келинига пул таклиф қилмаган. Эркак пулни чўнтагидан тасодифан тушиб кетгани айтган.

Натижада, айбланувчи Маъмурий жавобгарлик тўғрисидаги кодекснинг 41-1-моддаси 1-қисми (жинсий зўравонлик) билан айбдор деб топилиб, унга нисбатан 5 сутка маъмурий қамоқ жазоси тайинланган.