Ўзбекистонда космик суратлар орқали ноқонуний эгалланган ерларни аниқлаш бошланади
Ўзбекистонда ўзбошимчалик билан эгалланган ер участкалари ҳамда ноқонуний бино ва иншоотларни космик суратларни қайта ишлаш орқали аниқлаш амалиёти жорий этилади.
Маълум қилинишича, Президентнинг «Ер участкаларидан фойдаланишда давлат назорати самарадорлигини ошириш чора-тадбирлари тўғрисида»ги қарори қабул қилинган.
Унга кўра, «Ўзбеккосмос» агентлиги Кадастр агентлиги, манфаатдор вазирлик ва идоралар билан биргаликда 2022 йил якунига қадар синов тариқасида Тошкент шаҳрининг Мирзо Улуғбек ва Юнусобод туманлари ҳамда Тошкент вилоятининг Қибрай, Тошкент туманларида ўзбошимчалик билан эгалланган ер участкаларини, ноқонуний бино, иншоотларни космик суратларни қайта ишлаш орқали аниқлаш чораларини кўради.
Вазирлик ва идоралар «Ўзбеккосмос» агентлиги сўровига асосан унга юклатилган вазифаларни амалга ошириш учун зарур бўлган барча маълумотларнинг белгиланган тартибда тақдим этилишини таъминлайди. Бунда космик суратларни олиш ва уларни қайта ишлаш билан боғлиқ харажатлар «Ўзбеккосмос» агентлиги ва Кадастр агентлигининг бюджетдан ташқари маблағлари ҳисобидан қопланади.
Ушбу агентлик Кадастр агентлиги ва Бош прокуратура билан биргаликда ўтказилган синов натижаларидан келиб чиқиб, ушбу амалиётни республиканинг бутун ҳудудида жорий этиш юзасидан таклифларни 2023 йил 1 мартга қадар Президент Администрациясига киритади.
