Словенияда Ўзбекистон президентини расмий кутиб олиш маросими бўлиб ўтди

21 май куни Словения президенти таклифига биноан Люблянага расмий ташриф билан келган президент Шавкат Мирзиёев Конгресс майдонида расмий кутиб олинди. Бу ҳақда Ўзбекистон президенти матбуот хизмати хабар берди.

Хабарга кўра, Шавкат Мирзиёевни Словения Президенти Наташа Пирс Мусар кутиб олди. Фахрий қоровул саф тортди, икки давлат мадҳиялари ижро этилган. Президентлар фахрий қоровул сафи олдидан ўтиб, расмий делегациялар билан саломлашган.

Сўнгра «Звезда» боғида уруш қурбонлари ёдгорлигига гул қўйилиб, бу тинчлик ва инсонпарварлик ғояларига садоқат рамзи сифатида эътироф этилган.

Ташриф доирасида Шавкат Мирзиёев Словения президенти, парламент ва ҳукумат раҳбарлари билан учрашувлар ўтказади, шунингдек, қўшма бизнес форумда иштирок этади.

Музокараларда савдо-иқтисодий алоқаларни чуқурлаштириш, саноат, фармацевтика, электротехника, «яшил» энергетика, қишлоқ хўжалиги, меҳнат миграцияси ва гуманитар ҳамкорликни кенгайтириш масалалари кўриб чиқилиши режалаштирилган.